【Emily】港韓文化交流浪接浪 《秋天的童話》漢江播

【明報專訊】香港同韓國近期有唔少文化交流，除咗康城影后全度妍日前來港做舞台劇，下月喺香港又會舉辦韓國十月文化節，到時會有跆拳道表演同試穿漢服等。另外，文創產業發展處同貿發局日前率團參加釜山國際電影節，其間舉辦「香港之夜」同《他年她日》首映，之後由康文署接力，月底至下月喺首爾舉辦「香港周」。

在港有韓國十月 在韓有香港周

由駐港韓國文化院同韓國駐港總領事館合辦嘅文化節今年第15屆，活動之一係10月7日喺灣仔修頓場館舉行首屆韓國總領事盃跆拳道大賽，韓國國技院跆拳道示範團隊會來港獻技。中環PMQ喺10月11及12日舉辦韓國文化體驗，包括試穿韓服、K-pop舞蹈派對等。

音樂方面，韓國國立國樂院首次訪港，11月初喺葵青劇院表演宗廟祭禮樂。表演源自朝鮮時代王室祭享儀式，該儀式2001年入選聯合國非遺項目。

喺韓國舉辦嘅「香港周」都有好多活動，例如歌手王梓軒、口琴家何卓彥等會同韓國歌手、音樂家喺漢江公園中央草地廣場表演，之後會戶外放映經典港產片《秋天的童話》；水墨大師吳冠中作品就會喺首爾書法博物館展出；香港芭蕾舞團、香港中樂團、香港管弦樂團亦會喺當地表演𠻹。