【Emily】安安可可抵港一年 屋企將升級

【明報專訊】由中央贈港嘅大熊貓安安同可可，舊年9月26日抵港，到周五就滿一年，海洋公園噚日話會有一連串慶祝活動，而下月13日至12月12日會為佢哋嘅棲息地做提升工程，所以兩隻大熊貓將會暫別公眾。

園方話安安可可已適應新生活，飲食變得「多元化」，食更多種類嘅竹子、高纖餅乾、水果及窩窩頭。動物及保育執行總監祝效忠話透過正面獎勵訓練，安安目前已會自願配合抽血同打針，而可可喺今年發情周期後會逐步回復訓練。

公園話，本周五同周六探訪兩隻大熊貓嘅訪客，有機會獲得紀念品。園方呢兩日會舉辦工作坊，分別製作熊貓糞便再造紙，同埋用兩隻大熊貓「摧毁」嘅樹木製作鉛筆。入場票需要喺活動當日早上10時親身到「香港賽馬會四川奇珍館」領取，先到先得。