【Emily】離境稅下月加至200 推網上退稅平台

【明報專訊】飛機乘客離境稅10月1日起由120元加到200元，新稅率適用於10月1日當日或之後買嘅機票，政府加稅同時亦擴大豁免範圍，運輸及物流局噚日公布，獲豁免嘅旅客可以喺飛機離港當日起28日內，經網上退稅平台（www.APDTRefund.hk）申請退稅。

豁免對象包括抵港後同日或下一日轉機離港嘅乘客；經陸路或水路抵港後，同日或下一日離港嘅乘客，都可以豁免離境稅。

根據平台網頁，乘客要上載旅行證件、抵港及離港登機證、顯示已付離境稅嘅機票收據，一般3個星期內可獲批退款。退款方式可以揀喺機場指定兌換店領取現金，或者經電子支付，包括支付寶、微信支付、信用卡或扣帳卡收取。現金退稅會退回港元，電子退稅就可自選貨幣，不過要留意可能有手續費。