【Emily】東九文化中心「開幕季」周五賣飛

【明報專訊】11月正式啟用嘅東九文化中心將會喺11月至明年2月推出「東九開幕季」節目，各項節目門票周五起喺城市售票網發售。當中由演員鄭君熾飾演「高錕」嘅原創粵語音樂劇《一束光——高錕的記憶》率先登場，於11月15至30日喺設有1200個座位嘅「劇院」上演10場表演，票價由380至1180元不等。

東九開幕季有17個節目逾80場演出及活動，包括由加拿大音樂團隊錄映飛旋創作，將數碼科技與現場演奏銜接，再結合激光投影、即興演奏和肢體動作嘅《炫光狂想派》。節目12月5至7日喺配備三向舞台嘅「劇場」上演，門票售票由200至500元不等。

首次喺亞洲演出嘅舞蹈表演《觸動浮光》12月19至20日喺「劇院」上演，節目由澳大拉西亞舞蹈團與瑞士無人機技術先鋒Verity Studios合作，6名舞者將與透過編舞模擬人類複雜情感嘅無人機一同起舞，門票由180至500元不等。

除咗收費節目，東九開幕季有一系列免費活動，包括由成博民以九龍東發展史為靈感嘅建築立體光雕投影作品《暗地柔光》、首屆東九藝術科技見習員計劃成果展演《哦！你過界》等。