【Emily】立會活動為全運打氣 羅淑佩做plank hold到逾分鐘

【明報專訊】第15屆全國運動會11月9日開幕，殘特奧會12月8日登場。立法會噚日為此搞咗個打氣活動，喺地下大堂擺放乒乓波枱、虛擬劍擊場地及單車體驗區等設施，文化體育及旅遊局長羅淑佩、立法會主席梁君彥、多名議員同運動員出席，其間羅淑佩顯身手，同運動員一齊做平板支撐測試，維持時間超過1分鐘，體能好fit，局長仲玩埋虛擬劍擊。

羅淑佩並與梁君彥孖住上組隊打乒乓波，同經民聯議員林健鋒及體演文出界議員霍啟剛對戰，最終羅淑佩同梁君彥贏咗。立法會邀請咗多名運動員出席活動，佢哋同大家分享參賽心得同感受，之後就同議員交流切磋。梁君彥話港隊喺上屆全運會表現出色，今年參賽嘅運動員數目亦係歷屆之冠，相信今次全運會有更多香港運動員大放異彩。