【Emily】被問議員「70歲大限」 梁君彥黨友唔多講

【明報專訊】75歲嘅立法會主席梁君彥前日宣布唔再競逐連任議員，政圈內外關注議員年齡有無「70歲大限」。梁君彥嘅黨友、71歲經民聯主席盧偉國噚日出席記者會，被問到呢件事時話「呢個唔喺今日發布會議程入面」。另一黨友、73歲嘅林健鋒會後同Emily講，「大主席」主要同屋企人商量後做呢個決定，至於自己有無考慮唔選，佢就話要主持會議，先行告退。

經民聯倡准非本地生自費讀中小學

政府近年力推「留學香港」品牌。經民聯噚日召開記者會，倡議「留學香港」擴展至中小學，吸納更多非本地生入讀國際學校及私校，紓緩學童人口下降同學校收生壓力。議員梁美芬建議政府容許內地同部分亞洲國家學生自費入讀香港中小學、為父母陪讀簽證「開綠燈」，認為唔會加劇本地學生競爭。議員吳永嘉就話，香港有唔少空置土地同校舍，可以規劃為專門畀非本地學生入讀嘅特色學校同宿舍。至於會唔會因此推高國際學校學費，盧偉國就話唔擔心，覺得招收更多非本地生，可以令學校有足夠生源、更多資源，相信市場會自行調節。