【明報專訊】立法會飲食界議員張宇人發起飲食界喺國慶假期期間推出多項優惠之餘，仲連日四出試食宣傳，由忌廉椰絲包、軟雪糕到養生餐、軟餐，一律無放過。張宇人噚日就話食咗個「例牌早餐」，就係7-Eleven嘅咖啡同蛋撻王嘅忌廉椰絲包，仲講笑話平時食會被老婆鬧，有國慶優惠就可以「攞正permit（批准）」，仲打孖上𠻹！
近年有幾間大型食肆推出「軟餐」，今次國慶優惠都有參與，張宇人去到稻香集團旗下嘅鍾菜館食「同桌同餐吞嚥友善饗宴」，套餐包括屬五級軟餐嘅鮮蝦燒賣、鮑汁牛肉獅子頭，六級軟餐嘅金沙南瓜同七級軟餐嘅松露野菌焗芙蓉。張宇人又推介美心皇宮同荃灣八月花嘅軟餐，至下個月都有七折。
