【Emily】橋嘴島國慶日4000遊人迫爆 綠色和平：多破壞生態行為 包括捉海星海膽

【明報專訊】國慶黃金周吸引好多內地客來港，綠色和平10月1日喺西貢外島考察，發現位於世界地質公園嘅橋嘴島迫爆，全日超過4000人登岸，比五一黃金周東壩3000人到訪仲多。綠色和平話人流過多對環境構成極大壓力，佢哋喺現場就目擊唔少破壞環境嘅行為，促請政府推動「四山」生態旅遊項目前要制定全面生態旅遊政策。

人潮多過五一黃金周東壩3000人

綠色和平目擊嘅破壞環境行為，包括有船無視漁護署浮標，喺珊瑚區範圍落錨停泊；有遊人喺珊瑚區浮潛同踐踏珊瑚；挖掘海星、海膽、海參等海岸生物；隨處棄置垃圾；違法生火煮食。

籲推「四山」旅遊先訂保生態政策

綠色和平項目主任夏淳權話，今次橋嘴島迫爆，證明政府針對個別旅遊熱點加強執管係頭痛醫頭、腳痛醫腳，無助解決過度旅遊嘅問題，建議政府推動「四山」（太平山、鳳凰山、西貢海、大帽山）生態旅遊項目前，要制定全面生態旅遊政策，包括研究西貢海島嘅承載力，按生態敏感程度制定措施，例如限制生態敏感地區嘅人數同康樂活動，避免對地質公園造成嚴重環境破壞。