【Emily】未來科學大獎辦展回顧10年成果

【明報專訊】香港未來科學大獎基金會設立嘅「未來科學大獎」今年踏入第10年，即日至29日喺香港科學館舉行「2025未來科學大獎展覽」，除咗回顧大獎過去10年嘅重要時刻，同時亦透過獲獎者嘅訪談片段及互動展品，向參觀者展示科研成果，期望提高更多年輕人對科學嘅興趣。

即日至29日科學館舉行

科學峰會邀得諾獎得主

展覽喺本月24日及25日，會為本地中學生設導賞團，由館方人員導賞，學生亦有機會同海外科學家一同參觀。

另外，喺本月22日至26日，主辦方會以「年度科學盛事，啟迪未來之光」為題，喺唔同場地舉行「未來科學大獎周」活動，其中本月24日及25日喺香港科學館舉行「科學峰會」，講者包括2013年諾貝爾化學獎得主Arieh Warshel；26日就喺香港文化中心舉辦頒獎典禮同音樂會。

未來科學大獎設有生命科獎、物質科學獎、數學與計算機科學獎共3個獎項，單項獎金100萬美元（約780萬港元）。