【Emily】高才藍屋整花燈 融入街坊過中秋

【明報專訊】每年中秋，灣仔藍屋都掛滿花燈，今年嘅花燈有唔少出自高才之手，其中一個寫住「花好月圓」嘅花燈就係由26歲嘅高才Mahir製作。Mahir話一直渴望去唔同地方體驗文化，臨近中秋佢參與人才義工計劃嘅活動，同灣仔居民一齊整花燈、食月餅，了解中秋習俗。

Mahir係生物醫學博士，舊年12月經高才通計劃由英國來港，今年9月初加入城市大學團隊，專注研究癌症治療。Mahir父母係孟加拉人，佢自言喺亞洲文化中成長，而香港喺佢眼中都有以家庭為本嘅文化，所以生活喺香港令佢感覺唔錯。

今年係Mahir首次過中秋，仲幫手喺藍屋掛起花燈。參觀藍屋後佢話感受良多，平日一個人行街唔會留意到嘅唐樓特色、保育活化、鄰里故事都令佢大開眼界。

人才辦：義工計劃助練粵語

人才辦副總監歐雪雯話，來港人才普遍想了解香港嘅城市文化、社會背景，人才辦嘅人才義工計劃啟動呢一年嚟舉辦過好多活動，佢相信來港人才透過義工活動練習廣東話、了解社區，對佢哋落戶香港好有幫助。人才辦嚟緊並會組織超過100名人才，支援11月舉行嘅全運會。