【Emily】呢張唔係電影海報 係消防宣傳圖

【明報專訊】麥浚龍編導、製作連籌備歷時逾10年嘅電影《風林火山》月初上映，好睇與否見仁見智，但肯定係城中熱話，唔少人都加入「抽水」。適逢中秋，消防處噚日就喺facebook「跟風」改編《風林火山》海報做「風臨火山」，話秋「風」來「臨」，市民都記得切勿玩「火」，小心「山」火。

消防處將海報背景改成山火場景，話秋風雖然為中秋帶來涼意，但市民都要保持防火意識，唔好煲蠟玩火，亦要小心處理燃點緊嘅燈籠蠟燭；萬一遇上山火，可以向植物較稀疏嘅地方走避，並喺安全情况下報警，千祈唔好向山火蔓延嘅方向逃生。

網民讚靚抽 好過電視廣告

唔少網民噚日都留言大讚消防處「靚抽」，「成個水塘都畀你抽乾晒去救火」，帖文比電視廣告更令人印象深刻，「其他部門唔該學下嘢」；亦有網民笑問IKEA小編係咪轉咗做消防。另外，康文署噚日都提醒市民，中秋節都要保持地方清潔同愛護公物，千祈唔好掟熒光棒或其他物品去樹上，亦唔好放孔明燈。