Connect with us

港聞

【Emily】關懷LGBT 法領館下月辦研討會 分享當地經驗 杜麗緹:有空間辯論好重要

發佈於

【明報專訊】社會近年多咗關注性小眾權益,法國駐港澳總領事館下月舉辦「思想之夜」研討會,邀請法國同香港學者、民間團體,透過討論探討邊啲方式可以表達對LGBT群體嘅關懷。總領事杜麗緹(Christile Drulhe)同Emily講,有空間辯論好重要,所以活動會向公眾開放,亦希望介紹法國嘅經驗。

對《從今以後》印象深刻

杜麗緹話法國由1999年引入民事結合,到2013年立法通過同性婚姻,當時都有唔少爭辯。𠵱家回望,佢話法國大部分人認為立法無太大問題,對社會或家庭無影響,根據法國或歐洲經驗,反而認為立法有助促進對唔同性取向人士尊重同和諧共處。佢又話,歐洲各國唔止一種立法方式,最緊要繼續有辯論嘅空間。

包括法國在內,多個外國駐港總領事館早前都有支持香港同志影展,而喺法國地位僅次於康城影展嘅克萊蒙費朗國際短片節(Clermont Ferrand ISFF),亦有多部作品在港上映。唔少電影都刻畫性小眾現實處境,杜麗緹話自己對港產片《從今以後》印象深刻,好感人,表達到香港無正式承認同性伴侶框架下嘅困境。

話立法對港法治吸人才正面

立法會先前否決《同性伴侶關係登記條例草案》,杜麗緹話明白香港社會喺呢個議題有好多辯論,而香港國際社群都一直留意同性伴侶爭取權利嘅消息,佢話如果立到法,對香港法治同吸引人才都一定係正面信息。

繼續閱讀
贊助商