【Emily】建議北都街道徵名 「李家超道」點睇? 吳秋北：有貢獻嘅可考慮

【明報專訊】政府發展北都，預期將會興建大量新道路，工聯會最近做民調，話超過七成受訪者覺得北都街道同公共設施加入中國歷史文化元素，有助提升國民身分認同，會長吳秋北建議政府向市民徵名。民調中最多人建議加入「名山大川、著名景觀」元素，其次係「國家科技成就」元素，有受訪者建議用「五嶽」、「珠江」、「東江」、「天宮」、「神舟」、「蛟龍」等命名。

工聯會喺8至9月訪問327人，六成受訪者建議以名山大川元素命名，其餘依次係國家科技成就、民族英雄、抗戰及紅色歷史等。有記者問應唔應該以對北都有重要貢獻嘅人命名，例如「李家超道」，吳秋北笑住話無特別意見，對國家建設有貢獻嘅人都可以考慮，「如果好多人覺得呢個名好，自然就出現」。

陸頌雄又建議喺北都設立「數學公園」，以著名古代中國數學家祖冲之命名，或者考慮喺名稱加入「鄧氏」等傳統新界氏族元素，加強地區凝聚力。

工聯會同時建議政府制訂同定期更新「可供命名街道、地方及設施的特色元素參考清單」，同埋增設宣揚正向價值觀嘅要求等。被問到有殖民色彩嘅設施或街道名稱應否「去殖」，吳秋北就認為呢啲地方有歷史價值、有定位嘅功能，改名唔務實。