【Emily】工展會搞DJ打碟賽 揀歌要「乾淨」

【明報專訊】今屆工展會12月13號至出年1月5號喺維園舉行。入場者可以又買又食之外，大會今年搞新意舉辦DJ打碟比賽，即日起至11月7號接受報名，冠軍可獲現金獎1萬同價值1000元禮品。

比賽係免費報名，參加者要先上傳一段上限5分鐘嘅自選作品片段，初賽要用同一作品比賽，而且要係無不雅言語嘅「clean version」，亦要確保選用嘅資源唔犯法，唔可以有淫褻或具爭議、不當或政治元素嘅內容，仲要提供參賽片段所用嘅歌曲檔案，以及詳細歌曲清單。

大會會喺11月29號公布初賽名單，抽籤將參賽者分兩組，分別喺12月13號及12月20號舉行初賽，入到決賽可先獲得價值1000元嘅禮品，決賽喺12月26號晚舉行，冠亞季獎金分別有1萬、5000及3000元，以及1000元禮品。