經濟
GUM首席投資總監為人力前主席
【明報專訊】GUM首席投資總監劉嘉鴻噚日首次出席公司嘅強積金市場展望記者會，對香港政治或網台歷史有一定認識嘅讀者，相信會對佢個名有印象，佢就係人民力量嘅首任主席。
2011年退出社民連嘅黃毓民同陳偉業等合組人民力量，劉嘉鴻出任第一任主席，到2013年佢以專注私人事業發展為由，辭任主席轉任司庫直到2016年。佢喺2012年同2016年參選立法會，都未能當選。2021年人力前議員陳志全因「初選案」還押，佢同另外36名成員響應前執行委員蔡中平呼籲，退出人民力量。
翻查證監會紀錄，劉嘉鴻喺今年7月喺駿隆財務策劃顧問（即GUM）掛牌，之前喺2017年至2024年任職宏利投資管理。
另據劉嘉鴻嘅LinkedIn，佢再之前喺諮詢公司韋萊韜悅（WTW）同美世（Mercer）任職，向企業提供退休福利意見及財務分析。
另外，佢都曾經喺2014年7月出任當時仍由蕭若元持有嘅易還財務（8079）（現更名為仍志集團）做獨立非執行董事，到2016年6月因投入更多時間於個人事務而辭任。
