【Emily】渠蓋設計賽 藝術生憑藍屋奪冠

【明報專訊】繼2019年之後，渠務署去年為慶祝35周年，以18區特色為題舉辦渠蓋設計比賽「好蓋有您」，收到約2600份參賽作品，冠軍由以一級歷史建築灣仔藍屋為題嘅渠蓋奪得。冠軍得主林曉銘係藝術系學生，佢話藍屋承載灣仔居民回憶，希望憑作品提升大眾對藍屋及歷史建築嘅關注，政府多保留歷史建築，「唔係拆咗佢」，畀更多人認識香港本土文化與建築。

7款作品將多區安裝

渠務署新界北渠務部工程師陳裕坤話，署方將7款參賽設計變成實物，每款製作約10個渠蓋，除咗已完成安裝嘅藍屋渠蓋，其餘6款預計今年第四季裝完，「希望將城市基礎設施變成開放式藝術館」，又會同生產商研究點樣生產有關渠蓋，例如微調配色、加粗線條以便鑄造等。

亞軍由中西區電車街景及法定古蹟西港城獲得。季軍就有3款，分別係連接荃灣主要商場嘅行人天橋，以元朗百鳥塔、聚星樓及木棉樹海拼合嘅景象，同埋將軍澳跨灣連接路。另喺南區分數最高嘅熊貓主題渠蓋，將會安裝喺海洋公園站C出口及香葉道休憩處。