【Emily】請食非散水餅 江玉歡：唔好咁悲觀 網約車草案通過 張欣宇搵局長簽名

【明報專訊】近日焦點之一係每日有邊個立法會議員宣布唔參選，早前連番暗示未必參選嘅選委界別江玉歡（Doreen）噚日請傳媒食西餅，問佢係咪「派散水餅」，佢就叫大家「唔好咁悲觀」，只係想答謝傳媒，而已宣布唔選嘅經民聯主席盧偉國就派自家製糖水。

盧偉國請食自煮楊枝甘露

Doreen解釋，下周係最後一次大會，好多人會請食嘢，「我請你食咩，你都唔會覺得好食」，所以提早派餅，又重申下周大會會交代參選意向，至於消息係好係壞，佢話「唔好用好壞嚟形容」，人生仲有唔同崗位，做咩都要積極。

部分已宣布唔參選嘅議員噚日表現輕鬆，其中經民聯主席、71歲嘅工程界盧偉國就請傳媒食自家製楊枝甘露，又派發自己前年出版嘅食譜《疫情後的衣食住行》；新思維狄志遠一有機會就搵記者影相，神態輕鬆。而一向關注交通事務嘅香港新方向張欣宇（Gary）亦已宣布唔選，噚日立法會通過網約車條例後，Gary同運輸及物流局長陳美寶密密斟。佢會後同Emily講，為網約車立例係佢心願，所以通過後搵局長喺條例草案上簽名，再喺會議廳合照留念。