經濟
匯豐160年故事展 大館6展區供打卡
【明報專訊】匯豐160周年喺中環大館搞嘅「匯豐盛演160年故事展：細說豐年 匯聚未來」展覽，明日（17日）先至開始，但係小琴已經率先幫大家睇咗入面有咩睇啦。
呢次匯豐故事展分咗6個展區，入口就係「160年之旅由此出發」展區，入面放咗唔同年代分行櫃台嘅實景。小琴仲喺入面「開啟記憶金庫」展區，見到好耐以前卡通版出現嘅匯豐獅子錢罌、同埋模型立像可以畀大家去「打卡」，幫大家回到過去記返起匯豐以前嘅歷史。
話說匯豐呢個匯豐卡通獅子錢罌就「架勢」囉，小琴睇完個故事展後，仲突登去搵呢個錢罌嘅資料，發現見到喺Carousell竟然有人賣緊2500元！描述寫住係「匯豐銀行1973卡通獅子王錢罌」。除此之外，個「開啟記憶金庫」展區，都有好多嘢值得睇，例如1865年嘅股票證明同埋第一本客戶帳簿等等。
不過鍾意就唔一定要買嘅，大家都可以由聽日至11月7日，去中環大館睇匯豐呢個故事展，打吓卡、影吓相，留返個念都得嘅，個展係免費入場，不過大家記得要先喺網上預約。
