【Emily】MAMA下月移師啟德 最愛歌手今可投 滿14歲就可做會員投票

【明報專訊】「完善選舉制度」後嘅立法會12月有換屆選舉，但唔使等到12月，大家已經可以「一人一票」投票。亞洲音樂盛事「2025 MAMA AWARDS國際音樂頒獎典禮」11月28至29日喺啟德主場館舉行，係時隔7年重臨香港。大會噚日公布咗入圍名單，第一輪投票已經喺噚日開始，至26日截止，會按結果選出「FANS’ CHOICE MALE」同「FANS’ CHOICE FEMALE」最終入圍名單；而第二輪投票就喺30日開始，屆時更可投選「VISA FANS’ CHOICE OF THE YEAR」。

入圍名單出爐 分兩輪投票

任何人年滿14歲，就可以投票選出最喜愛男女藝人，方法係下載Mnet Plus應用程式並登記成為會員。

今年頒獎禮設有17個項目，包括最佳男女藝人、組合等。其中G-DRAGON、BTS嘅j-hope同Jin入圍今年「最佳男藝人獎」；女子組合BLACKPINK就入圍「最佳女子跳舞組合」，當中3個成員JENNIE、 JISOO及ROSÉ亦入圍「最佳女藝人獎」，其中ROSÉ憑同Bruno Mars合作嘅APT.入圍「最佳協作獎」。另外仲有年度藝人、年度歌曲、年度專輯等大獎。

早前請成龍做演唱會嘉賓嘅SEVENTEEN再次入圍「最佳男團」同「最佳男子跳舞組合」，TWICE同aespa就入圍「最佳女團」。《Kpop獵魔女團》兩首片尾曲都入圍「最佳OST獎」。