【Emily】灣區律師會招成員 入會要寫自身作用

【明報專訊】內地司法部先前公布支持喺香港籌辦粵港澳大灣區律師聯會，噚日開始招募首批會員。Emily留意到，有意入會嘅香港大律師或事務律師，要喺入會電子表格填寫「對聯會活動的期待及自身在聯會建設中能够發揮的作用」，如果唔夠位仲可以加紙或加長表格。

唔夠位填可加紙

根據廣東省司法廳同廣東律協指導嘅廣東涉外法律服務網公告，有「大灣區律師執業證」兼廣東省九市執業資格嘅香港律師可以申請入會，首批招募噚日起至本月31號截止。身兼律政司大灣區專責小組主席嘅副司長張國鈞都有轉貼申請資料，期待「大灣區律師」積極支持聯會。目前聯會籌備辦公室設喺司法部直屬單位嘅中國法律服務（香港）有限公司。

入會除咗要填寫教育背景、工作經歷、香港同內地公職等，法律服務經驗一欄限填揀選不多於3類，如普遍集中民商事法，例如國際貿易投資、金融及資本市場。雖然香港律師喺內地唔可以處理刑事案，但可以選填「白領犯罪與合規調查」或「其他」欄目。