經濟
中銀趁盲盒熱 借助MC仔谷卡簽帳
【明報專訊】「IP經濟」繼續火熱，盲盒熱潮席捲本地消費圈。今年在港盲盒相關簽帳金額按年倍增，中銀（2388）信用卡食住個勢，聯手人氣歌手張天賦推出「狂賞MC仔」盲盒活動，3款造型手辦公仔吸睛度十足，仲聯乘新地（0016）旗下商場推動本地零售消費。
即日起至11月底，客戶喺25個指定新地商場累積最多3筆簽帳滿1.3萬元，可獲等值300元嘅Point Dollar，仲有機會拎走「MC仔盲盒」一個！未知是否MC仔魅力太強，活動首4星期，中銀信用卡客戶喺新地商場簽帳金額按年升近三成；國慶黃金周首7日，中銀信用卡客戶喺新地商場簽帳金額更升到去年同期嘅1.6倍。
花開兩朶，另一邊巨星傳奇（6683）喺上海搞足一個月嘅「樂遊上海 尋找周同學」活動亦告一段落，總參與人次有成145萬，線上官方活動接觸超過2000萬人。快閃店人流突破3.2萬人次，靜安大悅城、美羅城等核心商場客流平均升三成，營業額升18%；連主題巴士都累計承運近6000人次，明星IP魅力果然不容小覷。
