【Emily】莫言與好友港辦展覽 卓永興捧場

【明報專訊】諾貝爾文學獎得主莫言同佢嘅好朋友書法家王振，最近喺香港中央圖書館展覽館辦書法及攝影展，唔少文藝人都慕名觀賞。副政務司長卓永興前日都去捧場，佢形容莫言大名鼎鼎，平易近人。

卓永興話，莫言及王振向佢介紹，今次展覽作品嚟自今年喺國內外遊歷時創作嘅詩詞、書法、攝影，地點同主題包括肯尼亞嘅黃金鱷、金錢豹、角馬；希臘神廟；埃及開羅老城大作家馬哈福茲常到嘅咖啡館等。

「放寬心 吃茶去」展期至11．3

展覽並播放一段記錄兩人創作歷程嘅片，卓永興話畫面令人感受到兩位對生活嘅熱愛、眼界嘅遼闊、觀察嘅敏銳等。佢又讚賞莫言往往喺所到之處，就地起興創作詩詞文章同揮毫，功力深厚、意境深邃。展覽以「放寬心 吃茶去」為題，展期至11月3號。莫言話，係見到現代人承受好多壓力，所以希望大家尤其年輕人，可以多停落嚟飲杯茶、放寬心情，消減生活上嘅壓力先繼續前行。