【Emily】乳健同行步行籌款 2000人參與

【明報專訊】香港乳癌基金會噚日喺出頂舉行慈善步行籌款活動「乳健同行 2025」，近2000人參與，行政長官夫人李林麗嬋、民青局長麥美娟及醫管局主席范鴻齡出席起步禮，籌得款項會用作支持基金會工作。乳癌基金會主席霍何綺華話，基金會今年成立20周年，基金會乳健中心篩查等服務為近3000人提早發現乳癌，乳癌支援中心亦支援33萬人次乳癌患者。

婦女界、醫學界同一眾藝人身穿粉紅色上衣，圍繞山頂道同盧吉道參與步行，霍何綺華話，2005年開始舉辦步行籌款，已累積超過2.5萬人參加。麥美娟就話乳癌係本港女性最常見癌症，近年個案仍持續上升，政府已加強篩查和支援，又提到特首今年《施政報告》將婦女自強基金嘅年度撥款由2000萬增至3000萬元，對婦女嘅工作非常重視。

選唔選？ 林哲玄：總結緊經驗

另外，立法會醫衛界議員林哲玄出席活動時被問角逐連任意向。林哲玄話仍喺度總結經驗，包括過去數年工作係咪跟所訂目標一致、自己係咪有信心做落去。被問是否覺得是時候有人接班，佢就笑言自己未到70歲，但長江後浪推前浪，「歡迎年輕嘅人」。