【Emily】AI取代初級職位 曾俊華：市場對畢業生需求將大減

【明報專訊】立法會選舉係咪應該70歲劃線？已離開政府、74歲嘅前財爺曾俊華就話「七十而從心所欲」，形容自己算幸福，𠵱家可以順自己嘅想法做事，「唔強求，隨遇而安，唔會搞到自己谷氣」。曾俊華現時閒來聽吓音樂睇吓電影，有研究新科技發展，玩吓AI改圖。佢話AI變得愈嚟愈「能幹」之後，會取代好多初級員工職位，令新畢業生喺市場嘅需求大量減少。

曾俊華話，佢成日叫年輕人喺AI時代，千祈唔好再好似佢哋咁，諗住可以一世打死一份工，應該要有多啲唔同嘅發展，認為一啲比較人性化嘅行業反而無咁易畀AI取代。佢估計AI好快會令大量新入職職級嘅白領職位消失，而家長最趨之若鶩嘅「三師」，將來都唔會再好似𠵱家咁吃香，因此，一啲AI無咁易取代到嘅人性化工作喺將來就會有較大優勢。佢提醒年輕人真係要做好「迎戰」嘅準備。