【Emily】民記5人無份爭連任 郭玲麗：落幕無悔 籲投票選「好議員」

【明報專訊】今屆立法會就快曲終人散，民建聯噚日公布下屆選舉26人參選名單，有5個現任議員無份，其中選委界郭玲麗喺社交媒體發感言，話「撫心自問，問心無愧在這一屆中做到『落幕無悔』」，又話自己任內獲不少好評，對於下屆選舉，佢都呼籲大家去投票，「為香港選出『好議員』」。同樣唔爭連任嘅新界東南議員李世榮仍關心黨務，噚日民建聯開記招公布參選名單時，佢嘅facebook帳戶一直收看直播。

做咗一屆議員嘅郭玲麗話，當初話過希望將基層聲音帶入議會，自評「相信玲麗已經做到了，不少人認為玲麗是議會中貼地及實幹的其中一位議員，獲得不少支持及正面評價」。

李世榮fb睇民記記招直播

做咗兩屆嘅劉國勳就為政府發展北都感鼓舞，又話唔做議員都會繼續支持北都發展成香港甚至大灣區嘅新中心，而自己就「是時候轉換角色，以另一種方式貢獻專業、延續初心」。

立法會內會主席民建聯李慧琼噚日公布撤回最後一次會議嘅「告別議案」辯論，令大家無機會表達感受及告別選民，而一眾議員前日喺立法會大樓，就同咗秘書處職員閉門茶敘，互相問好道別，現場仲有多名年屆七旬嘅議員切燒豬。