【Emily】周六港大資訊日 揀科參考MBTI

【明報專訊】16型人格測驗（MBTI）流行，唔少人鍾意用「I人（內向型）」、「E人（外向型）」等標籤做自我介紹。即將喺星期六舉辦資訊日嘅香港大學都玩埋一份，校方前日喺Instagram出帖，將16個MBTI劃分為4類學科，畀中學生做升學參考。

用作宣傳港大聯招（JUPAS）入學資訊嘅官方Ig前日出帖，以「SJ」類嘅MBTI為例，包括ISTJ、ESTJ、ISFJ、ESFJ，話呢幾類人特點係「重視秩序、責任、實務與穩健執行」，適合範疇係「經濟及工商管理、牙醫、法律、醫學」。至於「NF」類嘅INFJ、ENFJ、INFP、ENFP，特點係「關注人文、意義、溝通與影響力」，適合範疇係「文學、教育、社會科學」。

用MBTI揀科嘅參考價值見仁見智。但如果學生有興趣入讀港大，周六資訊日設多場講座，校方及學生代表會介紹各學院最新資訊，值得參考。今年活動主題係「AI for Every Mind」，港大亦會展示點樣將AI融入各科。