【Emily】中學生「模擬人生」學理財

【明報專訊】「量入為出」、「複利效應」、「未雨綢繆」呢啲理財概念大家可能都聽過，但點樣實踐對中學生來講就唔易。有團體同銀行合辦理財及職涯規劃工作坊，跟學生玩模擬人生遊戲，例如中華基督教會譚李麗芬紀念中學學生邱乙烆就模擬幫一個大學畢業生及一個退休人士理財，佢以高風險投資方式令儲蓄增加，但喺真實生活中，邱同學就有儲蓄習慣，並設定收支預算，話已經儲到「五位數」積蓄。

活動由星展基金會與青年成就香港部（JA Hong Kong）合辦。參加者之一、德蘭中學學生黃嘉怡話，以往每月好快就使晒零用錢，𠵱家學識將零用錢分為消費、儲蓄及投資三部分，仲要量入為出。呢項理財教育活動自舊年推出，已有超過4000個學生參與，有82%話參加半年後仍繼續將所學應用喺生活，養成儲蓄同記錄開支嘅習慣。