【Emily】大會last day議員「集郵」 狄志遠打立法局呔 林筱魯拎23條草案儲簽名

【明報專訊】立法會噚日舉行今屆最後一次大會，唔少議員趁任期結束前喺立法會「集郵」留念。其中新思維狄志遠攞住自己今年嘅工作報告，周圍請議員同記者簽名，又同議員官員合照。選委界別林筱魯更拎住23條草案文本，話呢條法案有歷史價值，邀請其他議員喺封面簽名。

狄志遠噚日好活躍，邀請醫衛局長盧寵茂、啱啱宣布唔參選嘅江玉歡合照，又同教育局長蔡若蓮握手同打卡。回歸前做過立法局議員嘅佢同Emily講，噚日特登打番條立法局時代嘅領呔。自由黨邵家輝就拎住部手機喺會議廳外走廊同人打卡，合照者包括不再競逐連任嘅郭玲麗等。

G19幫謝偉銓提前慶生

宣布放棄競逐連任嘅建測規園界謝偉銓（Tony），下星期一先係生日正日，一班「G19」議員就趁成員最後一次例會為佢提前慶生。Tony喺社交媒體話，由於選舉提名期將至，成員之後各有各忙，大家決定提前慶生。睇番影片，「班長」廖長江、財委會主席陳振英等多名議員圍住Tony唱生日歌、切蛋糕。Tony感謝簡慧敏同霍啟剛準備嘅蛋糕同生日卡，又感謝成員喺過去4年對「G19」同佢嘅支持。