【Emily】盧偉國色士風吹《順流逆流》告別立會

【明報專訊】今屆立法會會期噚日正式結束，議員各自紀念。經民聯主席盧偉國一向精通中西樂器，大會結束後，立法會大樓地下突然傳嚟一段音樂聲，原來係盧偉國用色士風吹奏徐小鳳嘅《順流逆流》，一衆傳媒、議員都上前圍觀。佢之後又同選委界別馬逢國、創科界邱達根、港島東梁熙合照。

唔少議員就喺會議結束後周圍打卡，例如曾被「點錯相」嘅選委界別劉智鵬同陳沛良就喺議事廳合照。因為左腳骨裂受傷要戴護具、手持拐杖嘅民建聯主席陳克勤就畀一班議員圍住影相，大家齊齊舉起左腳扮整親。

狄志遠話同何君堯啱傾

新思維狄志遠繼續連日「集郵」之旅，邀請選委界別何君堯喺工作報告上簽名，兩人又握手交談，原來佢哋嘅辦公室相鄰，狄志遠話兩人好啱傾，形容何「喺議會裏面就惡形惡相，但心底都係暖嘅男人」，何君堯就話「喺那短短日子裏，我哋（互相）深深咁烙印咗喺自己心坎裏面」。