【Emily】石門靈灰所全面無煙 設機械人巡邏

【明報專訊】下周三重陽節，食環署噚日提醒市民，新啟用嘅沙田石門靈灰安置所同紀念花園會全面實行無煙拜祭，場內禁止燃燒香燭祭品，市民可用鮮花代替。為令呢項規定有效執行，食環署引入咗配備AI技術嘅機械人（圖一）擔任「無煙大使」同「服務大使」；「無煙大使」喺日常巡邏時一旦偵測到煙霧或火焰，會向工作人員發即時警報，以及向相關訪客發警告信息，「服務大使」就負責為訪客提供流動客戶服務及信息廣播。

石門紀念花園設有撒灰草坪，裏面有紀念牌畀訪客懷緬先人，紀念花園內設有中式仿石水盆「靜念池」，並試行名為「連摺」嘅思念體驗，親友可以喺花形心意摺紙上寫上祝福，再摺好放入水中（圖二），抒發對先人嘅思念同祝福。