【Emily】盧煜明愛打機 鍾意射擊格鬥

【明報專訊】中文大學校長盧煜明研發嘅無創產前檢測享譽世界，但唔係書獃子，佢接受《中文大學校刊》訪問話，自己係攝影愛好者，以前會用菲林相機影相，甚至自設黑房冲曬相片，但𠵱家工作繁忙，佢就用智能手機影相記錄生活中嘅美好景像。佢仲會去睇戲減壓，早排睇咗《職業特工隊：最終清算》，仲每星期打乒乓波。諗唔到嘅係，盧校長仲愛「打機」，佢話當年玩第一代電子遊戲雅達利（Atari），𠵱家就打電腦遊戲，鍾意玩射擊同街頭格鬥遊戲。

亦愛攝影 每周打乒乓

盧煜明今年8月已被Emily「捕獲」佢睇林家謙演唱會。做教育，要打破同年輕人嘅隔閡，佢舉例今年3月崇基學院請咗校友歌手Serrini（梁嘉茵）返母校獻唱，佢都有去捧場，當日仲有充氣跳彈牀派對，佢話當時係人生第一次跳彈牀，試過先發現幾好玩。

睇Serrini返母校獻唱 玩埋跳彈牀

盧煜明上任後有唔少重要工作，包括制訂《中大策略計劃2026-2030》。與此同時，政府因財赤向大學「開刀」，大學未來三年撥款會縮減，中大約有10億元盈餘要「回水」畀政府。盧煜明話大學必須審慎規劃，保障重點領域唔受影響，例如一啲領先全球嘅科創研究、吸引國際人才加入、應對非本地生增加嘅住宿需求等。