【Emily】葉太：倘出馬或多番啲叫我「姐姐」嘅票 談黃碧嬌 話係「阿姐嚟，唔少居民信佢」

【明報專訊】新民黨來屆立法會議席由6減至3，黨主席葉劉淑儀噚日喺商台節目回顧選戰，覺得今屆多咗候選人，「啲票一定拉散晒」，又話如果佢親自出馬「可能屋邨區會多番啲叫我『姐姐』嘅（青年）票」。佢估計可能好多中產出咗埠，同時有人唔捨得佢退休，所以少咗支持者投票。

宏福苑前法團顧問、民建聯區議員黃碧嬌捲入大火風波，被問到事件有冇為新民黨帶嚟更多票，葉太話喺宏福苑有份投票嘅3個票站，民建聯陳克勤得票仍多過新民黨李梓敬，又話「嬌姐」以前係「大埔長期區頭」、「阿姐嚟」，唔少居民信佢、支持佢。講到新界東北、宏福苑相關票站投票率較低，葉太覺得災情下有人「唔出嚟投」，「投都係投白票」；有啲災民受政府鼓勵下投票，但可能「個心又唔舒服，咪求其投個白票」。

稱工聯會「唔使減人好幸福」

下次畀張文嘉轉戰選委界

放棄連任嘅葉太又話，新民黨議席少咗，因為只派一人出戰選委會界別，又提到工聯會派多人參選，「唔使減人，好幸福嘅黨啦」。佢又提到新民黨唔少人出戰直選「炮灰區」，而且選委會界別部署「有啲失策」，下次會畀「空降」新界西南嘅張文嘉轉戰選委會界。

至於有無貼士畀旅遊界江旻憓，葉太話「我唔熟佢」，又話江𠵱家係「紅人」，「我諗好多人幫佢，都唔使我畀咩意見」。