【Emily】錦田打醮竹棚列健力士紀錄 獲認證為「全球最大臨時竹搭祭壇」

【明報專訊】錦田鄉酬恩建醮上星期六展開，近期唔少人去參觀打卡，醮會中搭建佔地超過4.1萬平方呎嘅醮棚，更獲《健力士世界紀錄》認證為「全球最大臨時竹搭祭壇」。

3萬支竹搭成 5層樓高

醮棚係醮會嘅主要場地，打醮儀式、木偶戲同素宴筵席等都喺呢度舉行。今次醮棚用咗約3萬支竹搭成，約5層樓高，可容納6000人睇戲，外圍仲用多個發光花牌包圍，遍插彩旗，打破世界紀錄之餘，仲吸引咗不計其數嘅海內外人士嚟參觀，了解香港傳統文化。

錦田鄉酬恩建醮有超過300年歷史。當初清政府迫使山東至廣東沿海一帶嘅百姓向內陸遷徙，導致民不聊生，兩廣總督周有德及廣東巡撫王來任向朝廷力爭，令到百姓可以回鄉。錦田鄧氏族人為咗紀念二人、超度喺遷徙過程中過世嘅人及拜神祈福，決定每10年打酬一次，至今係第34屆。打醮期間會舉行過千人參與嘅行香儀式，舞龍、舞獅隨行表演，另有大士巡遊、祈福科儀、粵劇演出、打醮展覽等活動。錦田鄉酬恩建醮由12月13日至18日舉行，打醮展覽則去到19日，地點為錦田水頭村周王二公書院前。