【Emily】地皮曬太陽N年 葵涌公園終啟用

【明報專訊】早喺2017年《施政報告》宣布納入「體育及康樂設施五年計劃」嘅葵涌公園今日終於啟用，呢幅地曬咗好多年太陽，早被人批評浪費土地。康文署噚日喺facebook話，葵涌公園設有觀景平台同韆鞦椅，市民可以居高臨下揈住韆鞦觀賞藍巴勒海峽及青衣島東岸景色。根據署方網站及文件，今日啟用嘅葵涌公園第一期面積約3.02公頃，朝7晚11開放。

葵涌公園設有約5米高嘅滑梯、表演場地、休憩草坪及緩跑徑等，康文署話啱晒大家「見攰就唞」；公園亦設有大小狗活動區。

前身係醉酒灣堆填區嘅葵涌公園，所在位置佔地超過25公頃，原計劃1992年落成啟用，由於發現有沼氣而煞停，環保署喺2000年完成清除沼氣工程，將公園交番畀康文署。審計署喺2013及2017年兩度發表報告批評康文署歎慢板，大片空地曬太陽，唔知第二期又要幾耐先啟用呢？