曾志偉認山頭文化難搞 遺憾任內未辦音樂頒獎禮

【明報專訊】曾志偉辭任無綫總經理（節目內容營運），轉做諮詢委員會召集人，公布轉職翌日接受黎芷珊主持的節目《一周星星》訪問。他以「得不償失」形容5年總經理生涯，表示得到做管理層的學習機會並獲肯定，失去原本計劃60歲生日享受黃金十年，臨尾在無綫捱騾仔，自評表現50分，「盡力就100分」。辭任總經理後，曾志偉最開心零企業包袱，可回歸幕前，最想做港姐司儀。

被問到無綫的山頭文化有沒有改進？曾志偉承認好難，「呢方面零分，搞唔掂」。他自言身體力行做事，不想浪費時間去調解、處理埋堆及排斥的問題，「因為太難，我最唔想嘥時間去搞呢啲，人事太難解決，你杯葛我、我又杯葛你，與其花時間喺呢啲鬥爭上，不如做好啲節目，世襲嘅嘢好麻煩！」他最遺憾在職5年，還剩一件未做的事，「我最想做番一個，我哋香港大家都認可嘅音樂頒獎典禮，我返嚟呢幾年都未做到。因為頒獎典禮必須有一個大家都好認可的音樂榜，我哋未夠時間去做好咁多音樂上嘅嘢，呢個係我唯一嘅遺憾，其實我唔止想做香港，我想做成個大灣區音樂頒獎典禮，有籌備過，同好多大灣區不同電視台開過會，但未喺我任期發生到」。

娛樂組