蔡卓妍首認愛細10歲健身教練 鍾欣潼搣甩浮腫 身材樣貌回勇

【明報專訊】蔡卓妍去年被指跟年輕10歲的健身教練林俊賢譜姊弟戀，昨日伙Twins成員鍾欣潼（阿嬌）出席活動，被問到跟緋聞男友關係時，她霸氣說：「可以刪咗緋聞兩隻字！」首度公開認愛，大曬幸福。阿嬌搣甩浮腫，身材樣貌狀態回勇，透露專人設計的餐單十分有效，下周三迎45歲生日的她承認介意被小粉絲稱呼「阿姨」。

記者：林祖傑

攝影：劉永銳

Twins昨日於尖沙嘴出席手搖茶品店聯乘合作產品活動，招待200名粉絲，場外吸引逾千人圍觀，場面墟冚，有粉絲前一晚到場通宵霸靚位。圓潤了的蔡卓妍和身材樣貌回勇的阿嬌登場即慰問粉絲，蔡卓妍說：「Hello！好耐冇見，噚（前）日經過已見到有啲朋友響度通宵，哎呀，下次唔好啦！咁凍。」阿嬌謂：「大家好熱情，內心暖笠笠。」隨後二人即席畫了多幅親筆簽名畫作送給現場粉絲，分別畫了各自的寵物肖像、開心笑容和最喜歡的食物等，阿嬌畫了雞蛋仔，畫白飯的蔡卓妍見粉絲沒有反應即解釋，「我畫了全世界最鍾意食嘅嘢，就係飯，多謝！」場面搞笑。

Twins之後戴上手套製作茶品及試飲，尾聲與粉絲大合照。下周三（21日）45歲生日的阿嬌表示收到很多粉絲祝福，「好耐冇見大家，覺得好開心、興奮」。蔡卓妍附和：「好耐冇一齊合體見大家，嚟緊係阿嬌生日，生日前見到大家真係好開心」。她率粉絲大合唱生日歌送給阿嬌。

蔡卓妍常健身不怕凍

蔡卓妍和阿嬌興奮表示今年首次以Twins身分出席活動，蔡卓妍說：「知道不是公眾假期，好多人要返工返學來不到，不過已拍了很多片和相，放上網給來不到現場的粉絲睇，不過見有粉絲『七街瞓』好慘，因為天氣真的好凍。」阿嬌表示近日冷親，咳了兩日，要拿暖手蛋上陣。

蔡卓妍去年11月舉行生日派對賀43歲生日，緋聞男友健身教練林俊賢企正C位，地位超然，她霸氣道：「可以刪咗緋聞兩隻字嘅！」感情是否很穩定？蔡卓妍冧說：「𠵱家OK咪OK囉！開心就得。」她早前為時尚雜誌拍了一輯性感相，問是否健身有功，可接受大尺度？蔡卓妍笑言：「OK啦，尺度也不是好大，咩都試吓嘛！𠵱家唔試，唔通過多幾年先試？其實我都唔細，留倩影囉。」

蔡卓妍強調事前不用問准另一半，自詡是獨立的時代女性，不過承認受男友感染常運動，健康了所以不怕凍。蜜運中的她圓潤了，問到是否「幸福肥」？蔡卓妍甜笑說：「差唔多啦，一定不是我最瘦的時候，係幸福囉，係咪肥就唔夠膽講喇。」

阿嬌生日願望世界和平

隊友阿嬌則搣甩浮腫身材，稱狀態回復穩定，承認專人設計的餐單十分有效。問到過程可覺辛苦？她說：「老實講，我唔係keep住食，不過都有用。」阿嬌早前直播讀粉絲信，被小粉絲稱呼「親愛的鍾欣潼阿姨」，她大表不滿笑稱要教育一下對方。阿嬌解釋：「叫姨姨都好聽啲！因為過了二字頭，小朋友就會叫你做阿姨，我尊重，但不接受。」想永遠被叫姐姐？她笑言：「去街市都聽到靚女啦，係咪？」阿嬌表示生日願望是大家身體健康、世界和平。是否已準備好連串生日活動慶祝？她謂：「到時咪知囉，會po出嚟，唔係點叫你哋密切留意呀。」

Twins今年成軍25周年，問到可有慶祝活動？二人賣關子說請大家密切期待。會否希望於啟德主場館舉行周年紀念演唱會？蔡卓妍笑言：「好辛苦喎，個場好大，5萬人。」她被取笑有私人教練操體能，阿嬌笑說：「但我無吖嘛。」兩人提議若有車在台上「巡唱」可考慮。