【Emily】曾掌迪士尼助「轉盈」 金民豪4‧1任體育園CEO

【明報專訊】啟德體育園今年3月就開幕一周年，體育園噚日宣布委任香港迪士尼樂園前行政總裁金民豪為候任行政總裁，4月1日起接替莊澤基出任行政總裁，莊同日轉任高級顧問。

莊澤基同日轉任高級顧問

有留意開迪士尼嘅朋友對金民豪應該唔陌生，佢喺2008年8月獲委任為香港迪士尼樂園度假區行政總裁，經歷金融海嘯之後，一度將公司業績轉虧為盈，但2014/15年度轉盈為虧，2015年3月佢突然以個人理由辭任行政總裁。金民豪其後轉戰內地，出任萬達文化產業集團副總裁，2020年加盟中國文旅集團。

體育園董事會話，經過全面而審慎嘅遴選，好高興委任金民豪出任行政總裁，金民豪喺國際、內地及本地市場娛樂、旅遊及消費行業擁有超過30年領導經驗，喺業務策略、旅遊發展及大型場館營運方面有豐富經驗，有助進一步發揮啟德體育園潛能。董事會又話為確保交接順利，過渡期間金民豪會同莊澤基緊密合作，直至正式履新。董事會亦衷心感謝莊過去近10年嘅貢獻，指導園區嘅設計、興建同營運。