助賈思樂宣傳演唱會 黃日華懶理失業傳聞

【明報專訊】賈思樂偕好友黃日華接受HOY TV節目訪問，宣傳2月15日舉行的演唱會。兩人被問會否在演唱會合唱？賈思樂笑言要黃日華開金口好貴，「我請唔起，我們講心不講金，華哥重義氣，從不托手踭」。演唱會在情人節翌日舉行，黃日華自認不浪漫，「當年老婆（梁潔華）成日投訴我唔夠浪漫，嚟嚟去去都係嗰幾招，送99朵玫瑰之類，佢收到會好開心，我冇咁多時間構思乜嘢驚喜party」。

黃日華近年甚少出席公開活動，有報道指他失業，他表示不介意，對這些傳聞已百毒不侵，「我都辛苦咗幾十年，係應該退落嚟，做番自己鍾意做嘅嘢，前半生都稍為有啲成績，貢獻畀各大觀眾，後半生時間留番畀自己！你好難去確定每個人都鍾意你，網上言論更加離譜，大家講嘢毋須負責任，所以唔需要太過介懷、理會佢哋講乜，最緊要做好自己」。賈思樂認同並慶幸不懂中文。

娛樂組