【Emily】議員關注郊野承載力 倡預約先去得

【明報專訊】早前長假期大批內地旅客湧去郊野公園及離島，造成環境污染。立法會環境事務委員會噚日開會，唔少議員關注郊野承載力，其中選委界別李浩然建議喺旅遊旺季，要喺網上登記或預約先可以去指定景點，不過佢自己都話，郊野公園係開放嘅，無明確出入口。佢又話係咪可以喺一啲行山徑分段設置檢測儀器，以便分級管理，初期喺高風險地點試行，然後逐步擴展。選委界別林筱魯就話，政府致力推動生態保育及生態旅遊，產生唔少容量問題，關注會唔會用科技去監管及控制容量，例如無人機。

環境及生態局長謝展寰話漁護署係郊野公園嘅場主，會要求署方探討應用更多科技，例如無人機等監察人流。佢又話，當局短期內會繼續喺香港及內地宣傳教育，同時增加人手管理，亦會改善景點設施及指示；中長期會評核熱門景點嘅承載力，研究有冇新嘅管理方式，但需時探討。環境局話會改善太平山、鳳凰山、西貢海及大帽山四條山徑嘅配套設施，仲會規劃綠色旅遊行程，加強推廣郊遊禮儀及遠足安全等信息。