盧海鵬開騷 周潤發探班派利市打氣

【明報專訊】《盧海鵬鳴金收咪演唱會》昨日於尖沙嘴文化中心舉行，周潤發騷前特地到場探班，送上利市祝盧海鵬演出順利。周潤發對盧海鵬說：「喂，一年做一次，唔好唔唱呀！」他大讚盧海鵬龍精虎猛。盧海鵬受訪時被問開騷前可有跟周潤發跑步練氣？他說：「現在不用跟他跑，我朝朝自己跑，不跑邊有聲？唔跑冇氣，跑完練到氣和聲，連病都冇，冇好處跑來做咩？不如休息好過。」他稱周潤發忙於跑馬拉松，約跑步對方也沒有時間。

梁小龍離世 盧海鵬感驚訝

問到有沒有興趣跑馬拉松？盧海鵬說：「我冇能力吖！一跑得快咪心臟病囉，都幾十歲。」他表示做完騷會放假，之前為杜琪峯新片開工3日，停拍至今不知何時再開，「都唔知有冇咁長命等，呢啲嘢好難講，梁小龍突然間死都有嘅，我同佢好熟，平時都喺旺角飲茶，聽到消息好驚訝，佢又打得，身體又好，冇理由突然間會死」。

同場的黃日華和苗僑偉大讚盧海鵬很照顧後輩，二人亦照顧得對方非常好，除周潤發，他們都有負責接載盧海鵬去跑步，但前輩怕阻住他們跑，決定自己跑。苗僑偉說：「現在佢自己跑，因為屋企樓下跑好方便，每日跑一個鐘。」

黃日華難忘被盧海鵬「試咪」

問可曾被盧海鵬「試咪」？黃日華笑說：「我有，當時在訓練班拍劇集《仁者無敵》，半夜要講句很激動的對白，我講唔掂，佢比導演更快開咪鬧我，最終對白畀李成昌講，費事我阻收工，當時好想搵窿捐。」苗僑偉笑言：「我當時高大又黑黑實實，盧海鵬一想『試咪』，我就碌大眼望住佢。」

黃日華早前跟曾志偉與明星足球隊到雲南踢波，透露有少少高山反應，失眠兩晚。問到於慶功宴可有被雲南美女包圍？他說：「雲南美女斟酒是傳統儀式，我唔得，飲酒唔啱我，一定死硬，所以避開。」苗僑偉稱曾志偉趁現在無所事事經常去練波，「無所事事是好的，能養生，都做了幾十年」。

記者：林祖傑

攝影：鍾偉茵

■更多娛樂猛料 ﹕ol.mingpao.com