【Emily】人海加超技術 百足球小將贏東方三人組

【明報專訊】噚日有場本地波竟然同時有103人落場？Emily講緊嘅係由譚仔三哥米線主辦嘅「100 vs 3 足球小精英熱血迎戰職業王者」賽事，100名6至10歲嘅小學生喺啟德青年運動場越級挑戰3名港超東方球員，最終100名小學生以「蟻多摟死象」戰術以5：3贏波。

東方噚日派出前鋒大久保優、後衛賀爾同林衍廷應戰；小學生隊就以人海戰術同「扯衫尾」等超技術限制3名職業球員走動，並喺窄角度射入先開紀錄。東方3人組及後用速度擺脫學生，大久保優喺右路傳中畀林衍廷輕鬆射入。賽事最終由小學生隊以5：3贏波。

三哥：盼助小將追足球夢

三哥由2024/25年度起連續3年支持本地學界足球精英，並成為首個冠名贊助「全港學界精英足球比賽」嘅餐飲品牌。三哥市務總監施美琪話，舉辦呢場足球賽係希望提供平台幫助一班有夢想嘅小朋友敢去學、敢去試、敢去挑戰，一步步認識點樣走上職業足球員之路。