【Emily】誠哥「現身」駁病危傳聞 KOL貼近照 話周日仲打緊邊爐

【明報專訊】年事已高嘅長和系創辦人及資深顧問李嘉誠近年深居簡出，噚日朝早市場傳出佢病危嘅消息，仲話到佢入咗ICU（深切治療部），引起唔少市場中人同傳媒周圍打聽，據聞仲有電視台去咗港怡醫院門外等候。正當消息滿天飛之際，財經KOL葉朗程噚日下晝喺facebook發帖，上載咗一張聲稱新鮮滾熱辣嘅誠哥近照，話周日手舞足蹈嘅佢仲趁天氣凍打邊爐，再同朋友討論某項醫療科技嘅重大突破，間接幫誠哥粉碎傳聞。

消息稱無恙 長和股價升

Emily噚日朝早亦循多個途徑打探，收到嘅消息係誠哥老人家身體無恙，但官方始終無出來澄清。

對於葉朗程發嘅帖，有眼利嘅網友認出相中同誠哥言談甚歡嘅朋友，係腸胃肝臟科醫生許偉武。睇番資料，許醫生同李嘉誠的確早有淵源，其中李嘉誠基金會2022年推出支持私家醫院接受轉介病人緊急抗疫計劃，基金會同誠哥就特別鳴謝養和醫院及許醫生擔當醫管局同各間醫院間嘅協調工作。

從照片所見，現年九十有七嘅李嘉誠精神不俗。至於佢旗下嘅長和系股價，噚日就全線上升，謠言可謂不攻自破。