【Emily】卓永興巡鵝頸橋阻街 得果檔驚驚

【明報專訊】副政務司長卓永興前日用咗4個鐘頭由筲箕灣行到堅尼地城，視察街道清潔情况。事隔一日，Emily噚日中午經過銅鑼灣鵝頸橋街市，發現副司長行過嘅3個「黑點」中，只得生果檔有明顯改善，攤檔真係退後咗，無再佔用馬路，不過隔離嘅海鮮檔就繼續佔用馬路。另外，鵝頸街市及熟食中心對開嘅寶靈頓道街邊，仲係堆積大量膠籃同發泡膠箱，同卓永興當日見到嘅情况一樣，唔覺有咩改善。