【Emily】4高官憶中大時光 葉文娟孫玉菡遇上另一半

【明報專訊】現屆政府問責班子唔少係中大校友，其中有4個高官最近接受中大校友刊物訪問，回憶讀書時代侃侃而談。

特首辦主任葉文娟同勞福局長孫玉菡都喺大學遇上另一半，讀工商管理嘅孫玉菡講笑話，拍拖係大學使命之一，當年通宵揀科排足一日一夜，仲要唔係幫自己，而係幫當時嘅女朋友（即係?家嘅孫太）排。中大政政畢業嘅葉文娟亦喺籌辦宿生會時識到終身伴侶。

民青局長麥美娟話，讀書4年係人生最開心嘅4年。佢又透露，當年同現任深水埗民政專員黃昕然一齊喺新亞書院搞迎新營，慶功時成班同學一齊去大嶼山度假屋打麻將。

至於讀博士嘅創新科技及工業局長孫東記得，第一次喺香港出糧時，比之前多咗9000元，而當年港幣匯價仍高過人民幣，所以出糧時真係好開心又難忘。不過佢話，博士生活圍繞宿舍、實驗室、飯堂，比較遺憾無影太多相，畢業前先多影幾張。

相關字詞﹕麥美娟 中文大學 葉文娟 孫玉菡