【Emily】星光大道霹靂舞演繹4巨星故事

【明報專訊】霹靂舞（Breaking）將會係明年巴黎奧運嘅比賽項目，星光大道就同油尖旺民政事務處合辦霹靂舞巡遊暨巨星展覽「星光聲‧影夢」，以新編曲同舞蹈，重新演繹本港4位已故傳奇巨星嘅故事，包括李小龍、梅艷芳、張國榮及陳百強。巡遊活動將於4月23日（周日）下午兩點舉行，由星光大道李小龍銅像旁出發，途經梅艷芳銅像，以金像獎女神銅像為終點，預計有超過300人參加。

星光大道今次邀請咗獨立音樂人MC仁DJ音樂製作團隊，重編4位巨星嘅著名樂曲，加入霹靂舞及街舞元素，由5個霹靂舞港隊代表B-boy C Plus、B-boy SoSze、B-boy Four、B-boy SoulGreen、B-girl Ifree以舞蹈演繹巨星嘅故事。除咗巡遊，星光大道屆時會舉行為期兩星期嘅展覽，展示幾位巨星嘅經典造型，市民可於現場掃二維碼重溫佢哋嘅舊作。

相關字詞﹕MC仁 星光大道 霹靂舞