【Emily】議辦實習生「畢業」 陳沛良讚表現好

【明報專訊】香港教育大學亞洲及政策學系兩個學生Angene同Carrie，早前喺立法會選委界別議員陳沛良嘅辦公室實習，為期3個月嘅實習期結束，兩人正式「畢業」。陳沛良同Emily講，兩個學生一星期返兩日，有時會一齊去開會，又會幫手準備發言稿，但事先都會討論過議題，畀學生有個方向去寫，再修改發言稿內容，兩個學生都會加入自己嘅諗法。

陳沛良話兩人唔喺香港出世，但完全無融入嘅問題，仲好勤力好學，對佢哋嘅表現非常滿意，至於會唔會提早招攬佢哋加入議辦，陳沛良話要睇佢哋意向，暫時只知道佢哋都想畢業後留港發展。Angene話實習過程對佢加深課堂理解有幫助，又學識從唔同層面思考，Carrie就覺得實習過程可以培養到批判思維去分析社會事件。