【Emily】政府：人工島網頁2萬點擊 李立峯：可以話少

【明報專訊】環團前日公布關於交椅洲人工島項目嘅民調，發現98%受訪者無參與項目嘅公眾諮詢，發展局當晚還擊話收到7000幾份意見書，又話「單是專題網頁的點擊率達二萬次」。中大新聞與傳播學院教授李立峯噚日就話，點擊唔代表咩取態，仲話兩萬次點擊率「可以話係少」，局方攞呢項數字出嚟「比較奇怪」。

發展局嗰晚嘅發文係回應綠色和平同日記者會發表嘅調查結果，李立峯嗰日就獲邀喺記者會上幫手分析調查數據，佢噚日接受電台節目訪問咁講：「（發展局專題網頁）兩萬次點擊可以話係少」、「今時今日YouTube平台任何較受歡迎嘅片段點擊都過百萬……」

Emily亦發現，另一團體本土研究社喺2月發表嘅《問題島途：從全球大型填海工程看明日大嶼計劃的危機》入面嘅公開地圖連結，到噚日已有超過2.5萬次點擊率，比發展局1月推出嘅專題網頁仲多約5000次。