【Emily】建造業考察深中通道 登「基建神器」

【明報專訊】大灣區目前有唔少大型基建整緊，建造業議會上周末就率團北上考察，同行嘅有發展局常任秘書長劉俊傑、路政署長陳派明、土木工程拓展署署長方學誠，以及民建聯立法會議員劉國勳。佢哋一行人仲有機會登上內地兩項最勁嘅「基建神器」，即沉管船舶工程使用嘅船「一航津安1」，以及用作海底平整工程嘅船「一航津平2」。

劉國勳話，今次考察重點之一，係全長24公里，橫跨珠江口、連接深圳與中山嘅吊橋「深中通道」。深中通道地理上於港珠澳大橋以北，走線跟港珠澳大橋平行，預計2024年通車，曾有評論指深中通道會分走港珠澳大橋嘅車流。

一次整平海底範圍6個籃球場面積

劉國勳話，今次行程有中交建集團、中國路橋集團等專家解說工程技術。佢哋仲可以登上中國巨型工程船，包括「一航津安1」及「一航津平2」。前者被譽為世界安裝能力最大、性能最先進嘅專業沉管施工船舶；後者係一艘自升式碎石鋪設整平船，負責喺海底平整工程，話一次整平範圍可達6個標準籃球場面積。

劉國勳話，希望政府、建造界能持續與內地建造界交流，喺香港基建工程例如交椅洲填海等引入新技術，降低成本。

相關字詞﹕深中通道 劉國勳