【Emily】房協75周年活動 黃偉綸sell人工島北都

【明報專訊】為增加土地及房屋供應，政府推出交椅洲人工島及北部都會區計劃，但兩個項目均引發爭議，環團認為大規模填海會影響海洋生態，北都嘅基建設施會影響漁塘及濕地。副財政司長黃偉綸噚日早上出席房協成立75周年國際研討會致辭時，乘機為兩項目推銷，話喺現有技術下，政府會盡力確保填海工程對生態和環境嘅影響維持喺低水平，又話呢兩個項目可畀政府更大動力向可持續發展和宜居嘅目標進發。

何永賢盼房協齊建宜居社會

黃偉綸話，交椅洲人工島項目將於2025年開展首階段填海工程，預料最快3年後可完成土地平整、道路等基建，市民於2033年就可以喺人工島生活同工作；至於北都，佢話部分土地將會支援創科發展，料可提供嘅總樓面面積等同16.5個白石角科學園，可進一步推動港深合作和大灣區創科發展。

房屋局長何永賢同日傍晚出席房協75年慶祝酒會，佢話解決「住」嘅問題係政府重中之重，需開拓創新，因此政府以多管齊下策略，例如簡約公屋、輪候公屋時間封頂、縮短造地程序等，增加房屋供應，提升人均居住面積，增強市民嘅幸福感。局長話過去75年房協為香港作出嘅貢獻有目共睹，盼房協同政府繼續並肩，一齊創建宜居社會。

相關字詞﹕北部都會區 交椅洲人工島 房協