【Emily】議事廳「立」字歸位

【明報專訊】港澳辦主任夏寶龍周日到訪立法會，有人發現主席台前嘅「立」字標誌唔見咗，到噚日立法會開會，個「立」字已歸位（左圖）。睇番港澳辦之後發放嘅相片（右圖），夏寶龍同特首李家超等人當日一字排開，坐喺主席台前嘅一張長枱（左起：立法會主席梁君彥、李家超、夏寶龍、中聯辦主任鄭雁雄、外交部駐港特派員公署特派員劉光源），後面主席台的確係無咗個「立」標誌。事後有消息人士解釋，話係工作人員試位影相時，有人以夏主任個頭後面有個「立」字、影像效果唔好為由做咗改動。